ڕاگەیەنراوی کومیتەی ناوەندیی کۆمەڵە بەبۆنەی: ٢٦ی ڕێبەندان، ڕۆژی ئاشکرابوونی خەباتی کۆمەڵە



ڕاگەیەنراوی کومیتەی ناوەندیی کۆمەڵە بەبۆنەی:
٢٦ی ڕێبەندان، ڕۆژی ئاشکرابوونی خەباتی کۆمەڵە




خەڵکی خەباتکاری کوردستان!
کرێکاران و زەحمەتکێشان!

لە گڕوتینی ڕێبەندانی ١٣٥٧ی هەتاوی و لە ڕەوتی سەرکەوتنی خواست و ئیرادەی گەل بەسەر دەسەڵاتی ڕژیمی پاشایەتی پێشوودا، ڕۆژلەدوای ڕۆژ، باڵانس و هاوکێشەکان لە بەرژەوەندی خواستی گشتگیری خەڵک وەردەچەرخا. هەر لەم ڕۆژانەدا ژیلەمۆی ڕێکخراوەو بزووتنەوەیەکی نوێخواز و نوێگەرا بە هێز و هزرێکی نوێ وە لە ژێر پێستی کۆمەڵگا و لەنێو جومگەکانی جەماوەردا دەگەڕا و دەگەشایەوە. ئەم توانا و وزە شاراوەو کاریگەر و تێگەیشتووە، ئەرکی ڕێنوێنی و ڕێخەری و بەڕێوەبەری زۆرینەی جووڵان و خۆپیشاندان و نارەزایەتی دەربڕینەکانی لەئەستۆ بوو و ڕێبەرانی سیاسی و مەیدانییەکەی لە کورەی ڕووداوەکان و لەڕیزی پێشەوەی جەماوەری خرۆشاودا ڕێکخەر و هاندەر بوون. لەدوای برینداربوونی کاک حەمەحسێن کەریمی و پاشان گیانبەختکردنی لە ڕۆژی ٢٦ی ڕێبەندانی ١٣٥٧دا ئاگری نووستووی کۆمەڵەش کڵپەی کرد و بە پانتایی کوردستان، ڕووناکی و تین و بڕوابەخۆیی بە باڵای شۆڕشی نوێی کوردستانی ڕۆژهەڵاتدا بەخشی.  
 
هەر لە سەرەتا و لە یەکەم هەنگاوەوە، لە کەس شاراوە نەبوو کە هەڵگرتنی ئاڵای سەربەستی و دادپەروەری و ئەرکی پێگەیاندن و پێشکەوتنی کۆمەڵگایەک ساکار و هاسان نییەو هەورازێکی دوورودرێژی لەپێشە. لەم پێناوەدا بە هەزاران هاوڕێ و هاوسەنگەرمان لەدەستدا، سەدان چیرۆک و حەماسەی خۆڕاگری و بەرەنگاری و قارەمانییەتیمان تۆمار کرد، دەیان ڕێگای ئاشتیخوازانە و مەدەنی و سیاسی_مان بۆ گەیشتن بە مافەکانمان تاقی کردەوە، تەنانەت بۆ بەرگەری لە ماڵ و ژیان و مافی خەڵکەکەمان دەستمان دایە چەک و پاراستمان و هەموو شێواز و ڕەهەندەکانی خەباتمان هێنایە خزمەت ئامانجەکەمان. هەندێکجار سەرکەوتوو بووین و هەندێکجاریش دەرەنجامەکەی وەکوو دڵخوازمان نەبوو بەڵام هەموو ئەمانە دەرخەر و پیشاندەری یەک ڕاستییە، ئەویش ڕەوابوونی بزووتنەوەو ویست و خواستەکانمان و بەردەوامبوونی ڕێگا و ڕێبازەکەمانە.

جەماوەری تێکۆشەری کوردستان!

بۆ زیاتر لە چوار دەیە، ڕژیمی کۆماری ئیسلامی بە پێکهاتەو قەبارەیەکی تۆتالیتێر و پاوانخواز، دیکتاتۆرییەتێکی ڕەهای ئائینی و هەیکەلەیەکی گەندەڵ و سەرەڕۆ، وەڵاتی ئێرانی بەرەو داڕمانی سیاسی-ئابووری-کۆمەڵایەتی-کەلتووری و ژینگەیی بردووەو بە قۆرخکردنی دەسەڵاتی ناوەندیی، داخستنی هەموو دەرگاکانی بەشداریکردن لە سیاسەتی باڵا و بەرێوەبەری گشتیی، لەناوبردنی هەموو ئامرازەکانی چاودێری و پێوەرەکانی دێمۆکراسی، دزی و فەوتاندنی سامان و سەرچاوەگەلی سروشتی و مرۆیی، حکومەتێکی پۆلیسی-پادگانی، تێرۆر و تۆقاندن، سەرکوت و گرتن و کوشتن و ئەشکەنجە، سیخوڕی و سانسۆڕ و فیلتەر و حاشا و گۆڕینی ڕاستییەکان، هەوڵدان بۆ پاکتاوکردن و تواندنەوەی نەتەوە و باوەڕ و ئایینزا بندەستەکان، تێکدانی مێکانیزم¬گەلی نوێبوونەوەو خۆڕێکخستنەوەی کۆمەڵگا، بنکۆڵکردنی ئابووری لەسەر ڕێچکەی گەندەڵی و ڕانت و تاپۆکردنی لە دەست گروپێکی بچووک، تێکدانی ئامانجداری ژینگەو دەستێوەردان و پەیڕەوکردنی سیاسەتی دوژمنکارانەی دەرەکی و بگرە لەهەموو ڕەهەندێکەوە و بەپێی هەموو پێوەرێک، ناکارئامەیی و فەشەلهێنانی خۆی سەلماندووە.   
 
لە سونگەی ڕوانگەو چۆنییەتی هەڵسوکەوتیشی لەگەڵ کورد و جوگرافیای کوردستان، لەم ساڵانەدا ڕەق و قین و گوشار و دوژمنایەتی ڕژیم، هەتا هاتووە پەرەی سەندووە و زیادی کردووە. هەر لە پشتگوێ خستن و پەرەپێدانی دواکەوتوویی و گوشاری سیاسی و کەلتووری و کۆمەڵایەتی چەندقاتە هەتا کۆمەڵکوژی، کۆڵبەرکوژی، ڕەشبگیری، لەسێدارەدان، بەندکران و هەوڵ بۆ پۆمپاژی ئامانجداری هەواڵی ناڕاست و ئاسێمیلەی کەلتووری و شەپۆلی میدیایی، بە مەبەستی ڕووخاندن و تێکشاندن و لەناوبردنی ئیرادە و یەکییەتی و ورەی خەڵک، هەموو جۆرە پلان و پیلان و ڕێگا و ئاکارێکی بەدوور لە ئەخلاق و مرۆڤایەتی تاقیکردوەتەوە بەڵام ئەوەی پینەگەیشتووە، ئامانجە نگریسەکانی بووە.
    
٢٦ی ڕێبەندانی ئەمساڵ، ٤٢ ساڵ بەسەر تەمەنی ئاشکرابوونی خەبات و چالاکی کۆمەڵەدا تێپەڕدەبێت. کۆمەڵە وەکوو حیزبێکی ڕەسەن، بە ئەزموون و خاوەن پێگەوجێگەی جەماوەری و کۆمەڵایەتی لە بزووتنەوەی کوردستاندا سەرەڕای هەموو کۆسپ و تەگەرەو گرفتەکانی سەر ڕێگا، شێلگیرتر و بەهێزتر و پێداگرتر لە هەمیشە، پشت¬ئەستوور و پشت¬بەستوو بە  خواست و ئیرادەی خەڵکی کوردستان، ئەزموون و تێچووی زیاتر لە چوار دەیە بەربەرەکانێ و ڕووبەڕووبوونەوە لەگەڵ ڕژیمی کۆماری ئیسلامی ئێران دەکاتە چرای بەرپێ و کۆڵوانەی پشتی و سەنگەرەکانی مافخوازی، مرۆڤدۆستی، ڕزگاریخوازی و دادپەروەری ئاوەدان ڕادەگرێت و هەوڵ و هیممەت و هەنگاوەکانی بۆ دەستەبەرکردنی ئامانج و ئاسۆکانی چڕتر دەکاتەوە. پێداگریمان لە سەر هەوڵ و تێکۆشانی بێوچان بۆ یەکگرتوویی و یەکدەنگی لە بزووتنەوەی کوردستان و دەستەبەرکردنی دەسکەوتی گەورە لە پێناو رەها بوون لە ستەمی نەتەوایەتی هەر بەردەوام دەبێت و بەشێکی جیا نەکراوە لە خەباتی ئێمە دژ بە کۆماری ئیسلامی ئێرانە.  

کومیتەی ناوەندیی کۆمەڵەی شۆڕشگێڕی زەحمەتکێشانی کوردستانی ئێران، وێڕای بەرزڕاگرتنی ناو و یادی کاک حەمەحسێن کەریمی و سەرجەم گیانبەختکردووانی ڕێگای ڕزگاری و یەکسانی و عەداڵەتخوازی، بەبۆنەی ٢٦ی ڕێبەندان- ساڵوەگەڕی ئاشکرابوونی خەباتی حیزبەکەمان- پیرۆزبایی لە هەموو هاوڕێیانی بەشدار لە ڕیزەکانی نهێنی، ئاشکرا و دەرەوەی وەڵات، بنەماڵەی سەربەرزی گیانبەختکردووان، بەندکراوانی سیاسی، کەم¬ئەندامانی سەنگەر، ژنان و لاوانی ئازدیخواز و سەرجەم خەڵکی خۆڕاگری کوردستانی ڕۆژهەڵات دەکا و جارێکی دیکە لەسەر درێژەدان بە ڕێبازی ڕەوامان، خەباتی پڕشنگدار و تێکۆشانی بێوچانمان تا گەیشتن بە ئاوات و ئامانجەکانمان جەخت دەکاتەوە.  
 
 
کومیتەی ناوەندی کۆمەڵەی شۆڕشگێڕی زەحمەتکێشانی کوردستانی ئێران
٢٦ی ڕێبەندانی ١٣٩٩ی هەتاوی
١٤ی فێورییەی ٢٠٢١ی زایینی




ئه‌م بابه‌ته 245 جار خوێنراوه‌ته‌وه‌‌

AM:09:10:14/02/2021