دەیەمین كۆبوونەوەی ناوەندی هاوكاری حیزبەكانی كوردستانی ئێران بەرێوەچوو

بە میوانداری حیزبی دیمۆكراتی كوردستانی ئێران دەیەمین كۆبوونەوەی ناوەندی هاوكاری حیزبەكانی كوردستانی ئێران كاتژمێر ۱۱ی سەرلەبەیانی رێكەوتی ۱۹ی سەرماوەزی ۱۳۹۷ی هەتاوی پێكهات.
سەرەتای كۆبوونەوەكە خولەكێك بێدەنگی بۆ رێزگرتن لە گیانی پاكی شەهیدانی كوردستان و كورد راگەیندرا و پاشان دەستووری كاری كۆبوونەوەكە پەسندكرا.
بەرێز كاك حەمەنەزیف قادری بەرپرسی دەورەیی ناوەندی هاوكاری باسێكی لەسەر كار و چالاكییەكانی ناوەند و هەروەها میكانیزمەكانی كاركردنی ناوەندی هاوكاری پێشكەش كرد و دواتر هەركام لە حیزبەكانی بەشدار لە كۆبوونەوەكە وێرای سپاس لە بەرێوەبردنی كار و چالاكییەكانی ئەم دەورەیە پێشنیاراتی خۆیان بۆ چالاكییەكانی داهاتوو پێشكەش كرد.
لە برگەیەكی دیكەی كاری كۆبوونەوەكەدا هێلە گشتیەكانی ناوەندی هاوكاری و پرنسیپەكان و ئامانجەكانی ناوەند خرانە بەرباس و بە تێكرای دەنگی بەشدارانی كۆبوونەوەكە پەسند كرا.
بەشێكی دیكەی كاری كۆبوونەوەی ناوەند باس لەسەر هاوكاری ئەمنییەتی لایەنەكان بوو كە پاش نەزەر و بۆچوونی بەرپرسانی دەزگا ئەمنییەتیەكانی سەربەحیزبەكانی ناوەند ، بریار و راسپاردەی پێویست لەوە بارەوە بۆ میكانیزمی هاوكارییەكان پەسند كرا.
لە كۆتا باسی دەستووری كاری كۆبوونەوەی ناوەند پرۆژەی پلاتفۆرمی هاوبەشی ناوەندی هاوكاری رووبە ئۆپۆزسیۆنی ئێرانی خرایە بەرباس و پاش ئالووگۆری بیرورا بریاردرا لە داهاتوویەكی نیزیكدا پاش گونجاندنی نەزەری سەرجەم ئەندامان وەك پلاتفۆرمی ناوەندی هاوكاری رووبە رای گشتی و بەتایبەت ئۆپۆزسیۆنی ئێرانی بڵاو بكرێتەوە.
كۆبوونەوەكە لە فەزایەكی دۆستانەدا كاتژمێر ٤ی ئێوارەی هەمان رۆژ كۆتایی پێهات.

ناوەندی هاوكاری حیزبەكانی كوردستانی ئێران
۱۹ی سەرماوەزی ۱۳۹۷ی هەتاوی

ئه‌م بابه‌ته 328 جار خوێنراوه‌ته‌وه‌‌

PM:06:31:06/01/2019