سپاس و پێزانینی ناوەندی هاوكاریی حیزبەكانی كوردستانی ئێران بە بۆنەی پێشوازیی پڕ شكۆی خەڵكی كوردستانی ڕۆژهەڵات لە بانگەوازی مانگرتنی گشتیی

بە پێی ئەو هەواڵ و دێكۆمێنتانەی لە ڕۆژهەڵاتی كوردستانەوە هەر لە ورمێ و شنۆ، پیرانشار، مەهاباد و بۆكان و سەقزەوە تا دەگاتە بانە، سەوڵاوا، سنە، پاوە، مەریوان و كرماشان و سەرپێلی زەهاو و كەنگاوەر پێمان گەیشتوون و بڵاوبوونەوە، ڕۆژهەڵاتی سەربەرز و شۆڕشگێڕ ئەمڕۆ بەپیر بانگەوازی ناوەندی هاوكاریی حیزبەكانی كوردستانی ئێران و سەرجەم لایەنە سیاسییەكان و چالاكانی مەدەنیی كوردستانەوە هاتوون و بە مانگرتنی گشتی و داخستنی دوكان و بازاڕ، وێڕای مەحكوومكردنی تاوانەكانی ئێعدامی سێ بەندكراوی سیاسی كوردستان و پەلاماری مووشەكی و پیلانی تیرۆریستی بۆ سەر هێزە سیاسییەكانی ڕۆژهەڵات لە خاكی هەرێمی كوردستان دا، جارێكی دیكە یەكگرتووانە، جینایەتەكانی ٤٠ ساڵ دەسەڵاتدارێتی كۆماری ئیسلامی دژ بە خەڵكی كوردستان و بزووتنەوە حەقخوازانەكەیان مەحكووم و ڕیسوا كردەوە و هاوكات پشتیوانی و پشتگیریی خۆیان بۆ سەركردایەتیی سیاسیی بزووتنەوەی كورد لە كوردستانی ڕۆژهەڵات دووپات كردوەتەوە.

كۆمەڵانی خەڵكی تێكۆشەری كوردستان!
ئەو هەڵوێستە سیاسییە مانادارەی ئێوە سەلماندی كە جینایەتە سیستماتیك و پیلان بۆ داڕێژراوەكانی ڕژیمی كۆماری ئیسلامی بە درێژای چڵ ساڵی ڕابردوو بۆ دابڕاندنی جەماوەری كوردستان لە سەركردایەتی سیاسیی بزووتنەوە ڕەواكەیان، ناسەركەوتوو و پووچەڵ بووە. هەڵوێستی جێی شانازیی ئەمڕۆتان جارێكی دیكە دەریخستەوە كە گرتن، ئەشكەنجە ، ئێعدام و سێدارە، تیرۆر، تۆپباران و مووشەكباران، چەواشەكاری و زەخت و گوشار و هەڕەشە و سەركوت، ناتوانن ئیرادەی گەلی كورد بۆ درێژەدانی خەبات و تێكۆشان لە پێناو بەدەستهێنانی مافە ڕەوا و سەرەتاییەكانی خۆیان تێك بشكێنن.

خەڵكی وشیاری كوردستانی ڕۆژهەڵات!
ئێوە بەو مانگرتنە گشتییە بە بەرچاوی هەموو جیهانەوە، بە دۆست و دوژمنتان سەلماند كە ئێمە هەموومان وەك پەیكەرەیەكی یەكگرتوو و لێك جیانەكراو، سوورین لە سەر ڕێبازی بەرحەقمان بۆ گەیشتن بە ئازادی و، ئەوەندەی دیكە كۆماری ئیسلامی ئێرانتان لە بەرچاوی گەلانی ئێران و ڕای گشتی جیهانی، سووك و ڕیسوا كرد.
ئێوە بە پێشوازیی پڕشكۆی خۆتان لە بانگەوازی سەركردایەتی سیاسی بزووتنەوەی كوردستان، سەلماندتان كە بزووتنەوەی كوردستان، بزووتنەوەیەكی پێگەیشتوو و پێشكەوتووی بەرینە كە لە كات و ساتی خۆیدا لە هەموو پۆتانسیێل و تایبەتمەندییەكانی خەباتی جەماوەری بە هەموو ڕەهەندەكانییەوە بۆ گەیشتن بە ئامانجەكانی، كەڵك وەردەگرێت.
با كۆماری ئیسلامی و هەموو دەست و پێوەندەكانی بزانن كە كوردستان، سەنگەر لەشكان نەهاتووی خەبات بۆ ئازادییە و، گەلێك كە خاوەنی ئەو ئیرادە پۆڵایینە بێت بۆ ئازادی و مافەكانی، لە هیچ كۆسپ و تەگەرەیەك ناپرینگێتەوە و لە خەبات و تێكۆشان تا گەیشتن بە لوتكەی ئازادی هەدا نادات.
ناوەندی هاوكاریی حیزبەكانی كوردستانی ئێران، پێكهاتوو لە پێنج حیزب و لایەنی سیاسی، سپاس و پێزانینی گەرمی خۆی لە ئاست پێشوازیی گەرم و كەم وێنەی ئێوە كۆمەڵانی خەڵكی كوردستان لە بانگەوازی خۆی ڕادەگەیەنێ . بە دەنگەوەهاتن و پشتیوانیی لایەنە سیاسییەكانی دیكە لە بانگەوازی مانگرتنی گشتی و، بەشداریی ژنان و پیاوانی ئازادیخواز، چالاكانی سیاسی و مەدەنی و هەموو چین و تۆێژەكانی كۆمەڵگای كوردستان لەم مانگرتنە گشتییەدا، سەری سەركردایەتی بزووتنەوەی كورد لە كوردستانی ڕۆژهەڵات و هی خۆشتانی لە بەردەم هەموو خەڵكی ئێران و جیهاندا بەرز كردەوە و ئیرادە و بڕیاری گشتیی بۆ خەبات و بەربەرەكانی بەرامبەر ئەم ڕژیمە دیكتاتۆر و تاوانكارە، پتەوتر كردەوە. ئیوە جارێكی دیكە سەرشۆڕی و زەبوونیتان كردە حاسڵی پیلانگێڕییەكانی ڕژیمی داگیركەری كۆماری ئیسلامی و لاپەڕەیەكی پڕشنگدار و زێڕینی ترتان لە مێژووی خەباتی نەتەوەكەماندا تۆمار كرد كە دەتوانێ ببێت بە سەردەقی قۆناغێكی نوێ لە خەبات بۆ تۆمار كردنی ڕزگاریی یەكجاریمان.
ئێوە بە مانگرتنی گشتی و یەكگرتووانەی خۆتان، ئەم پەیامەشتان گەیاندە ئێمە هیزە سیاسییەكانی خۆتان كە ئەگەر یەكدەنگ وهاوخەبات و یەكگرتوو بین، ئێوە سەدقات باشتر بە دەنگمانەوە دێن. ئێمەش لەم رۆژە پڕشكۆیەدا بەڵێنتان پێ دەدەین كە بەرامبەر پەیامە پیرۆزەكەی ئێوە سەری ڕێز دادەنوێنین وبە شانازی و بە ئەركی خۆمانی دەزانین ئەم پەیامەتان لێ وەربگرین.'

سڵاو لە یەكگرتوویی خۆڕاگری و ئیرادەی خەباتگێڕانەتان،
سلاو لە گیانی پاكی نوێترین شەهیدانی گەلەكەمان لە كوردستانی ڕۆژهەڵات كە ئێوە ئەمڕۆ بە مانگرتنی پڕ شكۆی خۆتان، گیانی ئەوان و بنەمالەكانیان و هاوسەنگەرانی ئەوانتان شاد و هێور كردەوە و، ڕژیمی تاوانخوڵقێنی كۆماری ئیسلامیتان ڕیسوا كرد.
پتەوتر بێ یەكگرتوویی و هاوپێوەندیی نێوان هێزە سیاسییەكان و كۆمەڵان خۆراگری خەڵكی كوردستانی ڕۆژهەڵات

ئێوارەی ٢١ خەرمانانی ١٣٩٧ی هەتاوی
١٢ی سێپتامبری ٢٠١٨ی زایینی

ئه‌م بابه‌ته 462 جار خوێنراوه‌ته‌وه‌‌

PM:08:22:12/09/2018