ڕاگەیاندنی سكرتارییەتی كومیتەی ناوەندی كۆمەڵە بە بۆنەی گیان لەدەستدانی كۆمەڵێک ژینگەپارێز و چالاكی مەدەنی لە شاری مەریوان

بە پێی هەواڵەكان بە دوای ئاگر كەوتنەوە لە دارستانەكانی گووندی سەڵەسی سەر بە ناوچەی مەریوان ٤ كەس لە چالاكانی مەدەنی و ژینگەپارێزی و لەوانه چالاكوانی ناوئاشنا كاك »شەریف باجوەر» كە بۆ كووژەاندنەوەی ئاگرەكه چووبوونه ئەو ناوچەیه گیانیان لە دەست داوە و ژمارەیەكیش بریندارن.
لە كەس شاراوە نییە كە كاربەدەستانی ڕژیمی كۆماری ئیسلامی بەهۆی كەمتەرخەمی و زۆرجاریش بە هەوڵی بە ئەنقەست و بە پیلانی پێشوەخت ژینگە و دارستانەكانی كوردستان لە ناو دەبەن و لە بەرامبەردا چالاكانی مەدەنی و ژینگەپارێزی خۆجێی ناوچەكە بە كەمترین ئامراز هەوڵی پاراستنی ژینگەی كوردستانیان داوە.
كاك شەریف باجوەر و هاوڕێیانی لە زومرەی ئەو تێكۆشەرە ژینگەپارێزانەی كوردستانن كە ساڵانێك بە دەستی بەتاڵەوە لەو سەنگەرەدا وەستاون و بەداخەوە ئەمڕۆ لە پێناو پاراستنی ژینگەی نیشتمانەكەیاندا گیانیان بەخت كرد.
كۆمەڵەی شۆڕشگێڕی زەحمەتكێشانی كوردستانی ئێران وێڕای سەرەخۆشی و هاوخەمی قووڵ لەگەڵ بنەماڵەی قوربانیان و بە گشتی چالاكانی مەدەنی و ژینگەپارێزی كوردستان و بە تایبەتی مەریوان، كۆماری ئیسلامی به بەرپرسی سەرەكی ئەم ڕووداوە دەزانێت. كوردستان چوار دەیەیە بۆته كانگای كارەسات و بەردەوام لە ئاكامی پیلان و سیاسەتی هەڵه و ناكارامەیی كاربەدەستانی نابەرپرس قوربانی دەدات.

كۆمەڵەی شۆڕشگێڕی زەحمەتكێشانی كوردستانی ئێران
سكرتارییەتی كومیتەی ناوەندی
٣ی خەرمانانی ١٣٩٧ی هەتاوی
٢٥ی ئاگوستی ٢٠١٨ی زایینی

ئه‌م بابه‌ته 876 جار خوێنراوه‌ته‌وه‌‌

PM:06:18:25/08/2018