ڕاگەیاندنی كومیتەی ناوەندیی كۆمەڵه بە بۆنەی دەوری نوێی خۆپێشاندانی جەماوەری لە شارەكانی ئێران

گەلی تێكۆشەری كورد
جەماوەری خەڵكی ئێران
لە ڕۆژانی ڕابردوودا دەورێكی نوێی نارەزایەتی و خۆپیشاندانی جەماوری شەقامی چەندین شاری ئێرانی گرتۆەتەوە و خەڵكی وەزاڵەهاتوو، پێكهاتوو لە چین و توێژه جیاوازەكان بۆ داوای مافه ڕەواكانیان ڕژاونەته سەر شەقام و بەدانی درووشمگەلی جۆراوجۆر ناڕەزایەتی خۆیان بەم باروودۆخه دەردەبڕن.
قەیرانی بەڕێوەبەری و مۆدێلی دەسەڵاتداری كۆماری ئیسلامی چەندین ساڵە بەرۆكی خەڵكی ئێرانی گرتووه، مۆدێلێك كە پێیان وابوو دەتوانێت بەڕێوەبەرییەكی نوێ و تاقی نەكراوه پێشكەش بە دونیا بكات و بە ووتەی هەندێك لەكاربەدەستانی كۆماری ئیسلامی "مودیریەتی جیهانی" بكات، بەڵام ئێستا، مودیریەتی خۆشی پێ ناكرێ و قەیرانەكان ڕۆژ لە دوای ڕۆژ زیاتر دەبن و زیانەكەشی بەپلەی یەكەم، بەرۆكی چینی كەم داهات و هەژاری كۆمەڵگای  گرتۆەتەوە.
لەلایەكیترەوە لەسیاسەتی نێودەوڵەتیشدا كۆماری ئیسلامی كە ڕۆژانێك بانگەشەی " گۆڕینی بونیادی سیستەمی نێونەتەوەیی" (تغییر در ساختار نڤام بین الملل) دەكرد و هەموو وڵاتانی زلهێز و ناوچەیی پێ گەندەڵ و لەكار كەوتوو بوو،  بە ڕەچاوكردنی زیانبارترین سیاسەتی دەرەكی هەر لە هەناردەكردنی شۆڕشی ئیسلامی بۆ وڵاتانی ناوچەكه تا لەناو بردنی ئیسرائیل و لەو دواییانەشدا بە دەستێوەردانی لەڕادەبەدەر لە وڵاتانی سووریه، عێراق و یەمەن، زۆربەی وڵاتانی ناوچەكەی بە دژی خۆی هاوهەڵوێست كردووه. گەمارۆ ،ئابووری و سیاسیەكانی وڵاتی ئەمریكاش لەم قۆناغەدا بۆته ترۆپكی هەموو گووشارەكان بۆ سەر،كۆماری ئیسلامی و دەتوانین بڵێین ئابووری ئێرانی خستۆەته سەراولێژی داڕمان، بە جۆرێك كە تمەن بە تەواوی بەهای خۆی لە دەست داوە، تەنانەت پێش دەستپێكی گەمارۆ، ئابووریەكان كە لەڕۆژی ١٣ی گەلاوێژەوە دەست پێدەكات و پێدەچێت ئەوەندەی تریش كاریگەری نەرێنی لەسەر ئابووری ئێڕان دانێت.
بۆ زۆرینەی خەڵكی ئێران،  لە مێژساڵە كۆماری ئیسلامی شەرعیەتی سیاسی و بەڕێوەبەری نەماوە، ناكارامە بوونی ئەم سیستەمە،  سەرجەمی بوارەكانی ژیانی تاك و كۆمەڵگای گرتۆەتەوە: داڕمانی ئابووری، قەیرانی كەلتوور و ئەخلاق، قەیرانی سیاسی، نەبوونی ئازادی تاك و كۆ، پرسی ژنان و نەڕەخساندنی هەلی كار، قەیرانی بێ ئاوی و بێ بەرقیش نوێترین كێشەن كە لەسایه سەری كۆماری ئیسلامیەوە بەرۆكی خەڵكی گرتووه. هەموو ئەم كێشه كەڵەكەبووانەن كە چێتر بەڕێوەبەرانی كۆماری ئیسلامی بە كاتیش بۆیان چارەسەر نابێت و خەڵكی ڕژاندۆەته سەر شەقام و درووشمی نەمانی كۆماری ئیسلامی خستۆەته سەر زاریان.
لە خۆپێشاندانەكانی بەفرانبارەوە تا ئێستا، ئەوەی زۆر سەرەنجڕاكێشه ئەوەیه كە بۆ خەڵكی وەزاڵەهاتوو هیچ جیاوازییەك لە نێوان باڵەكانی كۆماری ئیسلامیدا نەماوە، پێكەنینه درۆیینەكانی بەناو ڕیفۆرمخوازەكان ئیتر لای خەڵك ڕەنگی نەماوە و ئەوەی دەبێ بڕوا و نەمێنی سەرجەمی كۆماری ئیسلامییه نەك ئەو باڵ یان فڵان كەس، بەڵكوو هەموو نیزام دەبێت بڕوات.
كۆمەڵەی شۆڕشگێری زەحمەتكێشانی كوردستانی ئێران كۆماری ئیسلامی بە سەرچاوەی هەموو ئەو قەیرانانه دەزانێت و پشتیوانی تەواوی خۆی لە داخوازیەكانی سەرجەم خەڵكی ئێران دەكات، ئاشكرایه بۆ خەڵكی كوردستان ماهییەتی كۆماری ئیسلامی هەر لە ڕۆژی یەكەمەوە ڕوون بووه و كوردستان بێ ڕاڕایی هەموو كات بەرانبەر بە كۆماری ئیسلامی لە سەنگەری یەكەمی مقاومەت و وەستانەوەدا ،بووە. نەمان و لەناو چوونی كۆماری ئیسلامی بە دڵنیاییەو بۆ ئێمەی كورد زۆرترین دەستكەوتی دەبێت، هەروەك چۆن مانەوەی كۆماری ئیسلامی تا ئیستاش بەشی زۆرتری زیانەكەی بۆ ئێمە بووه، بۆیه بەشداری كردن لە هەرچەشنه ناڕەزایەتییەك كە كۆماری ئیسلامی لاوازتر دەكات و كۆمەڵانی خەڵك لە سەركەوتن نزیكتر بكاتەوە ئەركی هەموومانه، بە دڵنیاییەوە لە كاتی گوونجاودا كوردستان بە درووشم و ئاجێندای خۆیەوە دیته ڕیزی پێشەوەی وەستانەوە بەرانبەر  بە،كۆماری ئیسلامی.

كۆمەڵەی شۆڕشگێری زەحمەتكێشانی كوردستانی ئێران
سكرتاریەتی كومیتەی ناوەندیی
١٣ی گەلاوێژی ١٣٩٧ی هەتاوی
٤ی ئۆگۆستی ٢٠١٨

ئه‌م بابه‌ته 661 جار خوێنراوه‌ته‌وه‌‌

PM:05:28:08/08/2018