ڕاگەیاندنی هاوبەش سەبارەت بە خۆپێشاندانی ناڕەزایەتیی خەڵكی ئێران

خەڵكی ئازادیخوازی ئێران،
نەتەوە مافویستەكانی ئێران،
كۆڕ و كۆمەڵە نێونەتەوەییەكان،
لە چەند رۆژی ڕابردوودا  شەپۆلێكی گەورە لە خۆپێشاندانی نارەزایەتی كۆمەڵانی وەزاڵەهاتووی خەڵكی ئێران دەستی پێكردوە و تا ئێستاش هەر بەردەوامە.
 سەرچاوەی سەرەكیی ئەم  نارەزایەتییانە قەیرانی ئابووری و گرفتە كەڵەكەبووە ئابووری و سیاسیەكان لە نێو ئێراندایە كە ئاكامی چەندین دەیە حكومەتی ستەمكارانە و قەیرانخولقێنیی كۆماری ئیسلامیە كە وای كردوە لەبەر دۆخی نالەبار و خەراپی ئابووری و بێمنەتی حكوومەت لە هەمبەر گوزەران و مەینەتەكانی خەڵكی كەمداهات و هەژارە، و هەروەها هەزینەكردنی بە میلیارد سامانی ئەم وڵاتە لە ئاژاوەگێڕێ و شەڕەتیرۆریستییەكانی رژیمی ئێران لە ناوچەی رۆژهەڵاتی نێوەڕاست، خەڵكی ئێران بە هەموو نەتەوە و چین و توێژی جیاوازەوە بێنە شەقام و داواكاریی خۆیان و دژایەتییان لەگەڵ تەواویەتی رژیمی ئیسلامیی حاكم لە تاران نیشان بدەن.
 ئەم خۆپێشاندانانە لە هەمان كات ئاماژەیەكە بە توڕەیی پەنگخواردووی ساڵیانێك لە حكوومڕانێكی ناكارامە، گەندەڵ، نادادپەروەر و دیكتاتۆر كە هیچ مەجاڵێك بۆ دەربڕینی نارەزایەتی بە شێوەیەكی مەدەنیانە بە شارۆمەندان نادا و لە بەرامبەیاندا بەرپرس نیە و هیچ حیسابێك بۆ ئێرادەی ئەوان ناكا.
لە هەمان كاتدا خۆپێشاندانەكان دەرخەری ئەو ڕاستییەن كە خەڵك بێهیوان بەرامبەر بە بەڵێنییە یەك لە دوای یەكەكانی ڕووحانی و دروشمە بریقەدارەكانی رێفۆرمخوازان و چیتر ئامادە نین پشت بە باڵەكانی دەسەڵات ببەستن.
ئەو نارەزایەتییەیانە زۆربەی شارەگەورەكانی ئێرانی گرتۆتەوەو دروشمەكانی خۆپیشاندەران بە روونی دەری دەخەن كە كۆمەڵانی خەڵكی ئێران و هەموو نەتەوەكان، بەتێكڕا ئەم رژیمەیان ناوێ و خوازیاری حكومەتێكی دێموكراتیكن كە وەڵامدەری داواكانیان بێ و دادپەروەری و یەكسانی و پاراستنی كەرامەتی مرۆیی و نەتەوەییان بۆ دەستەبەر بكا.
رژیمی كۆماری ئیسلامی وەك هەمووكاتی دیكە، لەبەرامبەر داوای رەوا و كردەوەی مەدەنیانەی خەڵكدا هیچ وەڵامێكی نیە جگە لە سەركوت و توندوتیژی و هەر لەم چەند رۆژەشدا بە سەدان كەسی دەسبەسەر كردووە و هێزی زۆری پاسدارو دژی گەلیی بە چەك و جبەخانەی جۆربەجۆرەوە رەوانەی هەموو شوێن و شارەكانی ئێران كردووە و بە زۆری چەك و سەركوت دەیەوێ خەڵك بێدەنگ بكا.
خەڵكی كوردستان كە خۆیان هەردەم پێشەنگی دەربڕینی نارەزایەتی لە شێوازی خۆپێشاندان و هەڵبڕینی دەنگی مافخوازی و ئازادیخوازی بوون، پشتیوانی لە داواكاری خەڵكی سەرتاسەری ئێران بۆ گەیشتن بە دادپەروەری و ژیانی باش و داهاتووی دێموكراتیك و یەكسان دەكەن.
ئێمە وەكوو حیزبی دێموكرات و كۆمەڵە، داوا لە هەموو كۆڕ وكۆمەڵە مرۆڤدۆستەكان و ناوەندە  سیاسی و بڕیاردەرەكانی جیهان دەكەین كە پشتێوانی داواكانی خەڵكی ئێران بن و گوشار بۆ رژیم بێنن كە هەرچی زووتر دەسبەسەركراوەكانی ئەم خۆپیشاندانانە و هەموو دەسبەسەركراوەكانی دیكە لە بزووتنەوە جەماوەریەكان لە كوردستان و لە نەتەوەكانی دیكە لە ئێران ئازاد بكا و هاوكات داوای ئازادكردنی هەموو زیندانیانی سیاسی لە رژیمی ئێران بكەن.

كۆمەڵەی شۆڕشگێڕی زەحمەتكێشانی كوردستانی ئێران
حیزبی دێمۆكراتی كوردستانی ئێران   
٩ی بەفرانباری ١٣٩٦ی هەتاوی
30ی دێسامبری 2017ی زایینی

ئه‌م بابه‌ته 736 جار خوێنراوه‌ته‌وه‌‌

PM:06:03:30/12/2017