ڕاگەیاندنی کۆمەڵه سەبارەت به پێشوازی بێ وێنەی کۆمەڵانی خەڵکی کوردستان لە تەرمی کاک ئەبووبەکر مەعروفی

ڕاگەیاندنی سكرتارییەتی كومیتەی ناوەندی كۆمەڵه سەبارەت به
گیان لەدەست دانی ئەبووبكر مەعروفی و پێشوازی بێ وێنەی كۆمەڵانی خەڵكی كوردستان لە تەرمەكەی

بەداخەوە بەرەبەیانی ئەمڕۆ ١٧ی نوامبر (٢٧ی خەزەڵوەر) كاك ئەبووبەكر مەعرووفی شۆفیری لە خۆبردوو و فیداكاری بۆكانی كە بە دوای بوومەلەرزە بەهێزەكەی كرماشان و دەورووبەری لەگەڵ شەپۆلی بەرفراوانی گەیاندنی یارمەتی بۆ لێقەوماوانی بوومەلەرزەكە و بەتایبەتی ناوچەی سەرپێل و سەلاسی باواجانی، لە ڕووداوی هات و چۆدا گیانی لە دەست دا.

لەوكاتەی كە ڕژیمی كۆماری ئیسلامی بە ڕەت كردنەوەی یارمەتییە نێونەتەوەییە مرۆییەكان و خەمساردی خۆی بەرامبەر بە بوومەلەرزە لێدراوەكان، لێقەوماوانی لە دۆخێكی مەترسیداردا بەتەنیا هێشتۆتەوە، جەماوەرێكی بەرفراوان لە هەموو شار و گوندەكانی كوردستانی ڕۆژهەڵاتەوە دەستیان كرد بە كۆكردنەوەی یارمەتی و گەیاندنیان بە دەستی لێقەوماوانی ناوچە بوومەلەرزە لێدراوەكان. كاك ئەبووبەكر لە زومرەی ئەو هەزاران خەڵكە خۆبەخشە بەهەڵوێست و دڵسۆزەی كوردستانی ڕۆژهەڵات بوو كە بۆ گەیاندنی یارمەتییە جەماوەرییەكانی باقی شارەكانی دیكەی كوردستان بۆ ناوچە بوومەلەرزە لێدراوەكان چالاكانە بەشداری كرد.

 بەدوای ئەم ڕووداوە لە كاتی گەڕانەوەی تەرمەكەی كاك ئەبووبەكر بۆ بۆكان، خەڵكی شارەكانی ڕەوانسەر، جوانڕۆ و كامیاران و گەورە دێی ماراو پێشوازییەكی شكۆمەندانەیان لە تەرمی كاك ئەبووبەكر كردووە و هەر ئێستاش بەرەو شاری سنە بەڕێوەن. هاتنە سەر شەقامی خەڵك بۆ بەڕێ كردنی تەرمی كاك ئەبووبەكر شانۆیەكی نەتەوەیی لە هاوپشتی و هاوسۆزی و هاوچارنووسی و هاوخەباتی خەڵكی كوردستانی ڕۆژهەڵاتە.

كۆمەڵەی شۆڕشگێڕی زەحمەتكێشانی كوردستانی ئێران وێڕای دەربڕینی هاوخەمی و سەرەخۆشی خۆی بۆ مەرگی شەهید ئەبووبەكر مەعرووفی بە بنەماڵەكەی و هەموو خەڵكی ئازادیخوازی كوردستان هاوكات سپاسی هەموو بەشداربووانی پێشوازییەكەی تەرمی كاك ئەبووبەكر دەكات.
 
كۆمەڵە وێڕای بەرز نرخاندنی هەڵوێستی مێژوویی خەڵكی كوردستان لە مەڕ بوومەلەرزەكەی ئەم دواییانەی كرماشان و قەسر و سەرپێل و سەلاس و دەوروبەری پێی وایە كە ئەم بزووتنەوەیە نیشانی دا كوردستانی ڕۆژهەڵات سەرەڕای هەوڵ و پیلانگێرییەكانی نزیك بە ٤ دەیەی كۆماری ئیسلامی بۆ لێكدابراندن و پەرتەوازە كردنی نەتەوەی كورد لە ڕۆژهەڵات، نەتەوەیەكی وریا و یەكگرتوو و هاوخەبات و هاوچارەنووسە و هاوهەڵوێستە.
 
سكرتارییەتی كومیتەی ناوەندی كۆمەڵەی شۆڕشگێڕی زەحمەتكێشانی كوردستانی ئیران
٢٧ی خەزەڵوەری ١٣٩٦ی هەتاوی
١٧ی نوامبری ٢٠١٧ی زایینی

ئه‌م بابه‌ته 864 جار خوێنراوه‌ته‌وه‌‌

PM:07:10:17/11/2017