ڕاگەیاندنی كۆمەڵە سەبارەت بە بوومەلەرزە بەهێزەكەی شەوی ڕابردوو

شەوی دوشەممە١١ لە سەر ١٢ی مانگی نوامبری ٢٠١٧ی زایینی (٢٢ی خەزەلوەری ١٣٩٦ی هەتاوی) بوومەلەرزەیەكی بە‌هێز كوردستانی ڕۆژهەڵات و كوردستانی باشووری هەژاند و گەلێك زیانی گیانی و ماڵی بە دوای خۆیدا هێنا. بە پێی ئامارەكان تا نووسینی ئەم ڕاگەیاندنە ٣٢٨ كەس لە كوردستانی ڕۆژهەڵات و ٧ كەس لە كوردستانی باشوور گیانیان لە دەست داوە و ٢٥٣٠ كەس لە ڕۆژهەڵات و زیاتر لە ٣٠٠ كەس لە كوردستانی باشوور بریندار بوون كە دۆخی زۆرێك لە بریندارەكان ناجێگیر و مەترسی دارە و ئەگەری زیاد بوونی كوژراوەكانی ئەم بوومەلەرزەیە بەهێزە. بە پێی زانیارییەكان ناوەندی سەرەكی ئەم بوومەلەرزەیە شارە دێی "ئەزگڵە"ی نزیك شاری "كرماشان" بووە لە بەری كوردستانی ڕۆژهەڵات و هەر بۆیەش زۆربەی قوربانییانی بوومەلەزەكەش لە شارەكانی كرماشان، قەسری شیرین، سەرپێل زەهاو، شائاباد، جوانڕۆ و ڕوانسەرن. بە پێی وتەی بەرپرسانی ناوچەیی نەبوونی كەل و پەلی پێویست لە ناوچەكان و زەحمەت بوونی گەیاندنی ئەو كەل و پەلە پێویستانە بە هۆی نەبوونی ڕێگاوبانی گونجاو بۆ ناوچە بوومەلەرزە لێدراوەكان، كێشەی سەرەكی قوربانییەكانە.
بە لەبەرچاوگرتنی ئەوەی كە پانتایی و ناوەندی ئەم بوومەلەرزەیە لە كوردستانی ڕۆژهەڵاتی ژێر دەسەڵاتی كۆماری ئیسلامی دایە و ئەم ڕژیمەش كارنامەیەكی ناسەركەوتووی لە بەڕێوەبەری قەیرانە چاوەڕوان نەكراوەكاندا هەیە و هەندێك جاریش بە ئەنقەست پێشی بە گەیشتنی یارمەتییە مرۆییەكان بۆ قوربانیان گرتووە، داوا لە كۆڕ و كۆمەڵە نێوەنەتەوەییە مافی مرۆیی و خێرخوازییەكان و وڵاتان دەكەین بە زووترین كات بە هانای قوربانیانی ئەم ڕووداوە دڵتەزێنەوە بێن.
ناوەندی بوومەلەرزە ناسییەكانی ئێران و ئەمریكا گۆڕی ئەم بوومەلەرزەیەیان بە ٧.٣ بە پێی پێوەری ریشتێر دیاری كردووە.
كۆمەڵەی شۆڕشگێڕی زەحمەتكێشانی كوردستانی ئێران پرسە و سەرەخۆشی خۆی ئاراستەی قوربانیانی ئەم ڕووداوە دڵتەزێنە دەكات و هیوای چاك بوونەوەی هەرچی زووتری بریندارەكان دەكات و هاوكاتیش جارێكی دیكە داوای بەپەلەی هەیە بۆ یارمەتی گەیاندن بە قوربانیانی ئەم بوومەلەرزەیە لە لایەن خەڵكی خۆجێی دەڤەرەكە و باقی ناوچەكانی دیكەی كوردستان، وڵاتان، ناوەند و كۆڕ و كۆمەڵە نێونەتەوەییە مافی مرۆیی و خێرخوازییەكانی جیهان.

سكرتارییەتی كومیتەی ناوەندی كۆمەڵەی شۆڕشگێڕی زەحمەتكێشانی كوردستانی ئێران
٢٢ی خەزەڵوەری ١٣٩٦ی هەتاوی
١٢ی نوامبری ٢٠١٧ی زایینی


ئه‌م بابه‌ته 1365 جار خوێنراوه‌ته‌وه‌‌

PM:02:51:13/11/2017